2022年頭，香港人多咗個經歷，就係大家嘅生活都幾離唔開堂食。恢復堂食之後，我發現自己原來最嚮往嘅唔係咩特色料理，又或者高當食府。因為自己想去嘅地方，係最普通嘅——茶餐廳。
茶記表面上看似平凡，但往往可以比到你獨一無二嘅體驗。嘢食方面未必會有啲咩令你一試難忘，但係總會滿意，夠方便？夠穩定？夠簡單？總有一樣係會令你覺得可靠。
我偶爾都會係喺茶記入面觀察唔同嘅食客。志在涼下冷氣飲杯凍飲嘅地盤佬，想普普通通食個燒味飯嘅西裝友，放學番屋企之前同同學打多幾鋪手機game嘅學生，偶偶偶偶然下都會有一啲都唔港女嘅女仔陪男朋友食下碟頭飯。
總之大家入到嚟好可能都懷住唔同嘅需要，但茶餐廳又偏偏滿足到咁多種唔同嘅需要。喺香港生活我有壓力，你有壓力，呢個小小嘅卡位就咁啱可以比唔同人暫時放低生活，唞啖氣，叉叉電。
What happens in vegas stay in vegas. 看似係一個重點，但係我自己嚟講，更加想追求嘅係 What doesn’t belong to vegas stay out of vegas.
儘管一定係屋企呀媽愛心飯冇味精，少油少鹽，但係偶爾你都好嚮往嗰個充滿鑊氣啖啖肉嘅豆腐火腩飯。有時可能好多人好嘈，坐得勁唔舒服，但你需要嘅寧靜，唔係要一粒聲都冇，而係暫時遠離某啲煩擾嘅聲音。有時你發覺有得選擇固然係好，但係唔需要做選擇，一個總會滿足到你嘅常餐A 又會搵到另一種幸福。
一個地方，可能唔係好有特色，但又樣樣啱你心意，呢種舒適仲難過有特色。一個地方，可以同時啱好多人嘅心意，咁其實佢係經營得好出色。
